1. ما تجبلهاش هدية
هتقول لي أول القصيدة كُفر كده؟ دي أهم حاجة في الفالنتين الهدية! هقول لك: لا، أهم حاجة المشاعر الحلوة والروح الودودة، سواء في الفلانتين أو غيره. الهدايا –في جانبها السلبي- تعبير عن قدراتك المادية أكتر، وازاي بتسعّر حبيبك وبتقيّمه، والأمر بيتحوّل إلى مباهاة سخيفة، فخليك مختلف، ما تعملش اللي القطيع بيعملوه، وما تربطش سعادتكم بمواسم وعُرف اجتماعي وترند على فيس بوك.
2. ما تقولّهاش بحبك
الحب اللي بيحتاج مناسبات بعينها عشان يطفو على السطح، يبقى استعراض ومنظرة، خلّي كل أيامك اعتراف بالحب مش يوم بعينه، ويكون الاعتراف ده مش بالكلام، لكن بالفعل وتحمّل مسؤولية العلاقة والسعي لتطويرها عشان تبقوا مع بعض طول العمر مش بس يوم في السنة.
3. ما تخرجوش لوحدكم
تعرف إن الصحبة حلوة قوي؟
عندك أيام كتيرة طول السنة اخرجوا فيها مع بعض لوحدكم، لكن في اليوم ده بالذات لِم الشلة وهيّصوا مع بعض، خصوصا الناس اللي مش مرتبطة، عشان تحسّسهم بالونس والدفا، والفرحة تعمّ بر مصر كله يا شقيق. العطاء وتَذكُر الآخرين في مثل هذه المناسبات بيقوّي العلاقة بينكم أكتر، وبيأكّد جذورها في قلوبكم وقلوب اللي حواليكم.
4. ما تنزّلوش صوركم على النت
أغلب الصور اللي الناس بتنشرها على فيس بوك؛ في المطاعم والشواطئ، وهي بتضحك وبتعمل وش البطة وبتغني وترقص: بلاستيك، مصطنعة، ملهاش علاقة بالحب الحقيقي واللي المحبين بيعملوه عشان بعض، فلو استمتعتم بلحظة.. صوّروها في قلوبكم وذكرياتكم، أو حتى خدوا صورة ليها بالموبايل، وخلّيها بينكم وبين بعض، إنت مش محتاج تقنعني إنك سعيد، ولا تقنع أي حد تاني، إنت محتاج تقنع نفسك والطرف الآخر بس.
5. هات لها علبة دبابيس/هاتي له هستازين
المزيد من المشاركات
تعرف -مثلا- إن دبابيس الطرحة حيّة وفيها الروح ودايما بتهرب من البنات، ويجوا الصبح يدوروا عليها ويتعصبوا بسبب غيابها؟ تعرف إنك لو جبت لها علبة دبابيس، أو أي حاجة عملية ورخيصة ومحتاجاها حقيقي، هتحبّك قوي؟
تعرفي إن الحساسية لما بتتقلب عليه بتخليه مخلوق تاني، ولو علبة الهستازين بتاعته –مضاد الحساسية- أو المحلول الملحي اللي ماشي بيه في جيب قميصه انتهت، هتبقى مشكلة كبيرة؟ لو بتحبيه حقيقي هاتي له حاجة ما بيتسغناش عنها، وكل ما يستخدمها وتكون سبب في راحته، يفتكرك ويضحك.
6. احضر معاها حاجة بتحبّها
المشاركة بتفرد مساحة الأرض المشتركة تحت رجليكم أكتر، وبتساعد على تلافي الخلافات بعدين، شوف لو عندها محاضرة، ورشة، حدث معين، وروحه معاها، حتى لو مش على هواك، وحاول تبقى حقيقي وما تُظهرش الضجر والملل، في العلاقات: مش لازم نعمل كل اللي بنحبه إحنا بس طول الوقت، فيه طرف تاني لازم ندي له مساحته ونبقى مرنين في التعامل مع احتياجاته.
7. استحمّى
لو قرّرت تقابلها النهارده، اهتم بنفسك شوية، يعني استحمى وحط عطر كده ودلّع نفسك. أقولك سر؟
البنات حساسة جدا للرائحة والنظافة الشخصية –أكتر مننا- ومعظم الرجالة بتكبّر دماغها، يعني بيبقى جاي من الشغل وتعبان وعرقان، وهوب ينزل يقابلها، فيه تصور أحمق في العقل الجمعي، إن التجمّل خاص بالنساء بس، في حين إنه أمر إنساني مش مرتبط بالنوع.
8. ورّيها خريطة الطريق
تعرف أحلى هدية في أي يوم من الأيام هي إيه؟ الأمان.
مشكلة علاقتنا عمومًا إنها ماشية في نور الله بدون خريطة أو خط نهاية، وبالتالي بتبقى عُرضة لكل أنواع العثرات، فلو إنت عايز تبهرها في اليوم ده حقيقي، طمّنها، اكشف لها خططك للمستقبل، وقول لها بقيتوا فين، وإيه اللي جاي، والخطوة التالية ليكم مع بعض هتبقى إيه؟
9. حبّها
تعرف لو بتحبّها بجد؟ دي هتبقى أكبر هدية ليها وليك في الوقت نفسه، والحقيقة دي هتفضل تلهمك بالتصرفات المناسبة اللي لازم تعملها طول ما إنت ماشي، لكن فكرة إنك مضطّر تفضل في العلاقة لأي سبب من الأسباب؛ مجاملة بقى أو مش لاقي غيرها أو بتجرّب أو مجبور عليها أو… أو… أسوأ تصرف ممكن تعمله، وخلي بالك: مفيش حاجة بتستخبّى، هتيجي لحظة كل شيء يتكشف، وهتبقى في موقف لا تُحسد عليه.
10. اعزمها على شاورما كتير كتير كتير.
التعليقات مغلقة.