بسم الله ماشاء الله … محمد صلاح بيقدم كورة غير معتادة … كل مرة توصل له الكورة بتشكل خطورة … كل كورة بتطلع من رجله فيها لمحة عبقرية … والنهاردة عمل أسيست عالمي لساديو ماني ووضعه أمام المرمى لدرجة إن مروان محسن كان ممكن يسجل منها … (ساديو ماني أصبح ثالث لاعب في تاريخ الدوري الإنجليزي يصل ل ١٠٠ هدف بدون مايكون فيهم ضربة جزاء واحدة … بعد هيسكي وفرديناند) … نرجع لصلاح … المتفرجين بقوا بينتظروا وصول الكرة ليه علشان المتعة … زي ماكانت الجماهير بتنتظر وصول الكرة لميسي.
المزيد من المشاركات
وفي الشوط الثاني أكد صلاح مقولة إنه أفضل لاعب في العالم حاليا … وأحرز هدفه ال ١٠٤ في الدوري الإنجليزي (متساويا مع دروجبا صاحب الرقم القياسي) … لكن الهدف نفسه أدى الى جنون المعلق الإنجليزي وفي رأيه ورأي الكثير هو هدف لا يسجله الا ميسي وقد يكون أفضل حتى من هدفه الإعجازي أمام مان سيتي قبل مباراة ليبيا … وأعتقد إنه لو كمل كدة سيفوز بجائزة الفرانس فوتبول العالم القادم.
أما لماذا لا يقدم صلاح، نفس المستوى مع المنتخب المصري؟ لسببين في رأيي الشخصي … أولا إن مافيش اليكساندر أرنولد في ظهره ولا ماني وفيرمينو بجواره … والسبب الثاني إني لو أنا لاعب وكيلي طالب أعلى رقم في الدوري الإنجليزي (حوالي ٥٠٠ الف جنيه استرليني في الأسبوع صافي بعد الضرائب) … فأكيد مش حاهين نفسي وأتعرض للإصابة من لاعب مغمور في المنتخب الليبي أو الجابوني أو أنجولا … ويقعدني في البيت ويقطع عيشي … أعتقد إنه حايظهر بقوة في المبارتين الفاضلتين بعد مرحلة المجموعات … قبل كدة الموضوع مش جايب حقه.
التعليقات مغلقة.